Болта

Возера Болта знаходзіцца у Браслаўскім раёне Віцебскай вобласці, за 5 км на паўднёвы захад ад Браслава, на тэрыторыі нацыянальнага парка «Браслаўскія азёры».

Плошча люстра вады — 0,5 км², найбольшая глыбіня — 4,2 м, сярэдняя — 2,9 м. Даўжыня возера каля 1,35 км, найбольшая шырыня — 0,45 км. Дно роўнае, пакрыта сапрапелем. Берагі нізкія, зарослыя кустоўем, на паўднёвым усходзе з плывучымі тарфянымі астраўкамі.

Працока з возера вядзе ў возера Дрывяты. Возера ўваходзіць у Браслаўскую групу — некалькі дзясяткаў азёр агульнай плошчай каля 130 км², злучаных працокамі і рэчкамі; большасць з іх ляжыць у басейне ракі Друйка.